जेन्जी आन्दोलनका क्रममा आन्दोलनकारीले मुख्यमन्त्रीको क्वाटरमा आगजनी गरेपछि गण्डकी प्रदेशका मुख्यमन्त्री सुरेन्द्रराज पाण्डे प्रमुख सचिव वस्दै आएको क्वाटरमा बस्न थालेका छन्। जेन्जी आन्दोलनका क्रममा गण्डकी प्रदेशको मुख्यमन्त्री कार्यालय सहित धेरै सरकारी कार्यालयहरु र मन्त्रीका क्वाटरमा आगजानी भएको थियो । क्वाटरमा आगजानी भएपछी मुख्यमन्त्री र मन्त्रीहरुलाइ वास बस्न समस्या भएको छ । आन्दोलनकारीले मुख्यमन्त्रीको क्वाटरमा आगजनी गरेपछि मुख्यमन्त्री सुरेन्द्रराज पाण्डे हाल प्रमुख सचिवको क्वाटरमा बस्न थालेका हुन । सुरक्षा र बसोबासका कारण उनले प्रमुख सचिवको क्वाटर रोज्न बाध्य भएको बताइएको छ ।
त्यस्तै, गण्डकी प्रदेशका अर्थमन्त्री टकराज गुरुङले अर्थ सचिवको क्वाटरमा बस्नका लागि ताला लगाएका छन् । उनी छिट्टै त्यहाँ स्थानान्तरण हुने तयारीमा रहेका छन् । आन्दोलनका कारण उच्च पदस्थ पदाधिकारीहरूको आवास व्यवस्थापनमा अव्यवस्था सिर्जना भएको छ ।
मुख्यमन्त्री र मन्त्रीले कर्मचारीहरुको क्वाटर कब्जा गरेपछी कर्मचारीहरुले भने असन्तुष्टी जनाएका छन् । उनीहरूले यो कदमलाई कर्मचारीप्रति अन्याय भएको गुनासो गरेका छन् । एक कर्मचारीले भने, “हामीलाई सहज आवास सुविधा दिन भनेर यी क्वाटरहरू तोकिएका थिए । तर, अहिले मन्त्रीहरूले कब्जा गरेपछि हामीलाइ समस्या पैदा हुनेभयो ।” यो अवस्था लामो समयसम्म रह्यो भने कर्मचारीहरूको मनोबल कमजोर हुन्छ ।” कर्मचारीलाई विस्थापित गर्नु दीर्घकालीन समाधान होइन । सरकारसँग आफ्नै आवास नीतिहरू छन्, त्यसलाई कार्यान्वयन गरेर दुवै पक्षलाई सहज हुने व्यवस्था मिलाउनुपर्ने कर्मचारीहरुको भनाइ छ ।
प्रदेश सरकारका अधिकारीले भने यसलाई अस्थायी कदमका रूपमा बुझ्न आग्रह गरेका छन् । उनका अनुसार, “मुख्यमन्त्री र मन्त्रीहरूलाई हालैका घटनाक्रमले विशेष सुरक्षा संवेदनशीलतामा राखेको छ । कर्मचारीहरूको असुविधा बुझिन्छ, तर चाँडै दीर्घकालीन समाधान खोजिनेछ ।”
