पोखरामा मंगलबारबाट सुरु भएको २४ औं आहा–रारा पोखरा गोल्डकपको उद्घाटन खेलमा आयोजक सहारा क्लब विभागीय टोली नेपाल पुलिससँग १–० ले स्तब्ध भएको छ । पुलिसका उज्वल राईको गोलको मद्दतले ६ पल्टको उपाधि विजेता पुलिस प्रतियोगिताको क्वाटरफाइनल प्रवेश गरेको हो ।
खेलको ३६ औं मिनेटमा पुलिसले पाएको कर्नरको सदुपयोग गर्दै राईले पुलिसलाई अग्रता दिलाए । उनको ‘लेफ्ट फुट’ प्रहार सानदार गोलमा परिणत भएको थियो । खेलमा उनी प्लेयर अफ द म्याच घोषित भए ।
अग्रता जोगाउन सक्दा पुलिसले क्वाटरफाइनलको यात्रा तय गर्यो । तीन विदेशी खेलाडी र आफ्नै एकेडेमीका खेलाडी लिएर मैदानमा उत्रिएको सहारा यसपल्ट पहिलो खेलमा हार व्यहोरेसँगै प्रतियोगिताबाट बाहिरिएको छ । पुलिसले माघ २६ मा ब्रिगेड ब्वाइज क्लब, यूकेसँग क्वाटरफाइनल खेल्ने छ । बुधबारको खेल विभागीय टोली एपीएफ र ए डिभिजन लिग टिम मछिन्द्र फुटबल क्लबबीच हुने छ ।
प्रतियोगिताको उद्घाटन पोखरा महानगरपालिकाका प्रमुख धनराज आचार्यले गरेका थिए । सहारा क्लब पोखराले यस वर्षको उत्कृष्ट राष्ट्रिय फुटबल खेलाडी सम्मान सनिष श्रेष्ठलाई प्रदान गरेको छ । उद्घाटन समारोहमा उनलाई ५० हजार ५ सय ५५ रुपैयाँसहित क्लबले सम्मान गरेको हो । उक्त पुरस्कार बापतको रकम क्लबका मानार्थ सदस्य खेमबहादुर गुरुङले प्रदान गर्दै आएका छन् ।
