२५ औं पोखरा सडक महोत्सवमा कम्तिमा पाँचलाख आन्तरिक पाहुना भित्र्याउने लक्ष्य आयोजकले लिएका छन्। महोत्सवको २५ औं संस्करण विहीबारदेखि पोखराको पर्यटकीय क्षेत्र लेकसाइडमा सुरु हुँदैछ। पाँचदिनसम्म चल्ने महोत्सव रेस्टुरेन्ट एण्ड बार एशोसिएसन (रेवान) पोखराले आयोजना गरेको हो।
‘क्रिसमस देखि नै यो पटक केही दिन बिदा परेकोले पोखरामा आगामि केहीदिन अघिल्ला साता भन्दा बढी पाहुना आउने अपेक्षा हो। होटलको बुकिङ सुरु भईसकेको छ। आन्तरिक पाहुनाको चलहपहलले हामी उत्साही भएका छौं,’ मेला तयारीबारे जानकारी दिन आयोजित पत्रकार भेटघाटमा अध्यक्ष भट्टराईले भने, ‘आन्तरिक पाहुना पोखरा भित्र्याउने यो नै सबैभन्दा महत्वपूर्ण र भव्य इभेन्ट बनेको छ।’ पोखरामा भित्रिने आन्तरिक पाहुनाका कारण अबका केहीदिन पोखरा र आसपासका पर्यटकीय क्षेत्रले लाभ पाउनेछन्। पाँचदिन चल्ने महोत्सवमा बढी भन्दा बढी पाहुना भित्र्याउने गरि विभिन्न भागमा प्रवद्र्धनात्मक कार्यक्रम गरेको पनि उनले बताए।
अंग्रेजी पुरानो वर्षको बिदाई र नयाँवर्ष स्वागतार्थ आयोजना गरिने पोखरा सडक महोत्सव लेकसाइडको तीनकिलोमिटर क्षेत्रमा संचालन हुनेछ। हरेक वर्ष एकै समय र अवधिका लागि मेला चल्छ। महोत्सव अवसरमा व्यावसायीले सडकमै रेस्टुरेन्ट राखेर पाहुनाका लागि खाना पस्किनेछन्। रेवान महासचिव विकास भट्टराइले अघिल्ला वर्ष भन्दा भव्य बनाउने गरि महोत्सवको तयारी गरेको बताए। विभिन्न संस्कृति, खाना र म्यूजिकलाई प्राथमिकता दिएर मेला आयोजना गरिरहेको र यसले पोखरामा सबैखाले पाहुना आकर्षित हुने उनले बताए। ‘सबैखाले र उमेर समूहका पाहुनाका लागि मेलाले कुनै न कुनै रुपमा मनोरञ्जन दिलाउनेछन,’ उनले भने।
