पोखरा
गण्डकी प्रदेश सरकारले ल्याएको बजेट माथी टिप्पणी गर्दै नेकपा एमाले गण्डकी प्रदेशका प्रमुख सचेतक गोविन्दबहादुर नेपालीले जनतामा उत्साह भर्ने बजेट नभएको बताउनुभएको छ । प्रदेश सरकारले ल्याएको बजेटको प्रतिक्रिया दिदैँ प्रमुख सचेतक नेपालीले यो बजेटले जनतामा नैराश्यता कायम गर्ने बताउनुभयो । बजेट परम्परागत रहेको भन्दै उहाँले सत्ता पक्षका सांसदहरु समेत सरकारले ल्याएको बजेट बाट खुसी हुन नसकेको बताउनुभयो । ‘बजेटमा गेम चेन्जर आयोजनाको कल्पना गरेका थियौं, उहाँले भन्नुभयो, ‘बजेट भाषण सुनेर सत्तापक्षकै माननीयले असन्तुष्टी मन भित्र कुण्ठित पार्नुभएको छ, यसले निकास दिन सक्दैन । प्रमुख सचेतक नेपालीले बजेट नतिजामुखी नभई निर्वाहमुखी भएको बताउनुभयो ।