जगिन्द्र वि क
ताराखोको आलुको अहिले गण्डकी प्रदेशमा माग बढेको छ ।
किसानको मुख्य आम्दानीको श्रोतका रुपमा रहेको आलुको माग बढेसँगै आलु खेती प्रति पनि अझै आकर्षण बढेको स्थानीय मिथुन घर्तीले बताउनु भयो।
ताराखोला गाउँपालिकाबाट गत वर्ष मात्र ७ लाख १२ हजार ५ सय ६८ के जि आलु उत्पादन भएको कृषि शाखा प्राविधिक सञ्जीव थापाले जानकारी दिनु भयो ।
आलुको लागि बजार सजिलै पाइने भएकोले किसानले हरेक वर्ष आलु उत्पादन बढाउने प्रयास गरेको ताराखोला–वडा नं. ५ को अध्यक्ष मन बहादुर रोका मगरको भनाई छ ।
रोकाले गत वर्ष १ एक सय मुरी आलु उत्पादन गरेको र यो वर्ष भने १ सय २० मुरी भन्दा धेरै उत्पादन गर्ने लक्ष्य राखेको बताउनुभयो ।
आएका पाहुनालाई खुवाउनेदेखि कोसेली पठाउनेसम्म पनि तराखोलाको आलु प्रख्यात मानिन्छ । त्यस्तै आलुबाट चिप्स बनाउने उद्योग पनि केही वर्ष अघि सञ्चालनमा ल्याइएको थियो।
उक्त उद्योगलाई अझै व्यवस्थित गरेर लैजान पालिककाले कार्यक्रम बनाइरहेको ताराखोला गाउँपालिकाका अध्यक्ष धन बहादुर बिकले बताउनुभयो ।
त्यस्तै बागलुङको ढोरपाटनमा नगर पालिकाको ढोर क्षेत्र ,काठेखोला गाउँपालिकाको धम्जा, बागलुङ नगरपालिकाको भकुण्डे, जैमिनी नगरपालिकाको दमेक र बरेङ गाउँपालिकाको सुखौरा भित्रिबन पनि आलुको लागि प्रख्यात ठाउँ हुन् ।
ताराखोलाको आलु १ केजीको ४० रुपैंया र एक पाथीको २ सय रुपैयाँमा बिक्री हुँदै आएको स्थानीय कृषक शर्मिला रोका मगरले बताउनु भयो ।
