सामाजिक सञ्जाल मार्फत चिठ्ठा परेको भन्दै प्रलोभन देखाएर सर्व-साधारणलाई ठगी गरेको आरोपमा उदयपुर प्रहरीले एक स्थानीयसहित ३ जनालाई पक्राउ परेको छ।
सामाजिक सञ्जाल ह्वाट्स एपमा चिठ्ठा परेको झुट्टो जानकारी दिएर विभिन्न प्रलोभन देखाई ठगी कार्यमा संलग्न हुनेहरू कटारी नगरपालिका ३ का उज्ज्वल थापामगर, विशाल थापा र चितवन रत्ननगर नगरपालिका २ का सुशील श्रेष्ठ पक्राउ परेको प्रहरीले जनाएको छ। उनीहरु पक्राउ परेको विषयमा जिल्ला प्रहरी कार्यालयमै पत्रकार सम्मेलन आयोजना गरी जानकारी दिएको हो।
उनीहरु संलग्न गिरोहले सदरमुकाम त्रियुगा नगरपालिका ३ का उदय राईलाई २२ लाख २० हजार रुपैयाँ ठगेको प्रहरी भनाई छ। सामाजिक सञ्जाल ह्वाट्स एपमा २५ लाख चिठ्ठा परेको भन्दै सो रकम प्राप्त गर्न कर तिर्नुपर्ने भन्दै पटक पटक गरी राईबाट २२ लाख २० हजार रुपैयाँ ठगेको प्रहरीले जनाएको छ।
प्रहरीका अनुसार पछिल्लो समय सामाजिक सञ्जाल फेसबुक म्यासेन्जर तथा मोबाइल फोनमा सम्पर्क गरी चिठ्ठा परेको भन्दै प्रलोभन देखाएर ठगी गर्ने गिरोह सक्रिय भइरहेको प्रहरीले जानकारी दिएको छ। ठगी गर्ने क्रम बढेको जनगुनासो आएपछि प्रहरीले निगरानी बढाउँदा प्रारम्भिक चरणमा ३ जना पक्राउ गर्न सफल भएको जिल्ला प्रहरी प्रमुख एसपी ज्ञानेन्द्र फुयालले बताए। उनीहरुलाई जिल्ला प्रहरी कार्यालयकै हिरासतमा राखेर आवश्यक कारबाही प्रक्रिया अघि बढाइएको उनले बताए।
पक्राउ परेकाहरु संलग्न समूहले सर्व-साधारणको सामाजिक सञ्जालबारे अध्ययन गर्ने, सम्बन्ध बढ्दै गएपछि विभिन्न प्रलोभन देखाउँदै लिङ्क पठाउने, चिठ्ठा परेको भन्दै फोन गर्ने र रकम प्राप्त गर्न कर बापत पैसा बुझाउन लगाउने गरेको प्रहरी अनुसन्धानले देखाएको छ। पैसा लिन उनीहरूले ई-सेवा, -आइएमई-पे, कनेक्ट आईपिएस लगायत माध्यम अपनाएर पैसा पठाउन लगाउँदै ठगी गर्ने गरेको देखिएको एसपी फुयालले बताएका छन्।
प्रारम्भिक अनुसन्धानमा ठगी समूहले विभिन्न जिल्लाका सर्वसाधारणबाट पैसा लिएको विवरण फेला परेको छ। सुरुवाती अनुसन्धानले नै ठगीमा पर्नेको संख्या ठुलो हुनसक्ने अनुमान गर्न सकिने उनले बताए ।
पक्राउ परेकाहरुलाई जिल्ला अदालतबाट ६ दिनको म्याद थपेर ‘मुलुकी अपराध संहिता २०७४’ को ठगी, आपराधिक विश्वासघात तथा आपराधिक लाभसम्बन्धी कसुरमा अनुसन्धान सुरु भएको एसपी फुयालले बताए।
