पवर्तको दुर्लुङबाट पोखरा आइ बसोबार गरेकाहरुको संस्था दुर्लुङ समाज पोखराले संघीय सांसद पदम गिरी र पर्वतबाट प्रदेश सभाको निर्वाचनमा निर्वाचित रेखा गुरुङ, भक्त कुँवर र मित्रलाल बस्याललाई सम्मान गरेको छ ।
समाजको दोस्रो साधारण सभाको अवसरमा राष्ट्रिय सभाका अध्यक्ष गणेश तिमिल्सिनाले उनीहरुलाई सम्मान गरेका हुन् । साधारण सभामा बोल्दै राष्ट्रिय सभा अध्यक्ष तिमिल्सिनाले दुर्लुङ समाजले सुरुवात गरेको एम्बुलेन्स अभियानलाई सकारात्मक रुपमा हेरिएको सुनाए ।
संघीय सांसद पदम गिरीले एम्बुलेन्स सञ्चालनको लागि सहयोगको प्रतिवद्धता जनाए । प्रदेश सभा सदस्य मित्रलाल बस्यालले पनि एम्बुलेन्स अभियानमा सक्दो सहयोग गर्ने प्रतिबद्धता जनाए । अर्का प्रदेश सभा सदस्य भक्त कुँवरले समाज गठन गरी आफ्नो जन् थलोमा केही गर्नुपर्छ भन्ने भावनाको कदर गरे । प्रदेश सभा सदस्य रेखा गुरुङले जनताले देख्ने गरी काम गर्ने बताइन् । कुश्मा नगरपालिका उपप्रमुख स्वास्थानी रिजालले वडामा एम्बुलेन्स नहुँदा बिरामी ल्याउन असहज भएको अवस्थामा दुर्लुङ समाजले गरेको अभियानमा हातेमालो गर्ने बताइन् ।
उनले ५१ हजार रुपैयाँ एम्बुलेन्स अभियानमा सहयोग गर्ने प्रतिबद्धता जनाइन् । कार्यक्रममा दुर्लुङ समाज पोखराका अध्यक्ष बाबुराम पौडेलले संस्थामा भए गरेका कामको विवरण सुनाए । कार्यक्रमको सञ्चालन सचिव ईश्वरी पौडेलले गरेकी थिइन् ।
