पोखरा
पोखरामा भेडा, च्यांग्राको मुल्य अचाक्ली बढेको छ । मुस्ताङ बाट बडा दशैँको लागि बेच्न ल्याईएका भेडा, च्यांग्राको मुल्य प्रति गोटा ४८ हजार सम्म पर्न गएको छ । यो मुल्य पोहोर परारको तुलनामा अचाक्ली हो । चीनको स्वशासित क्षेत्र तिब्बतको कोरला नाका बन्द हुँदा यस वर्ष पनि दसैंका लागि पोखरा ल्याइएका भेडा, च्यांग्रा महगों पर्न गएको बताइएको छ ।
कोरला नाका बन्द हुँदा तिब्बतबाट भेडा, च्यांग्रा कम आएपछि मुस्ताङमै महंगिएको छ । कोरोना भाइरसका कारण विगत ३ वर्षदेखि उत्तरी कोरलानाका बन्द अवस्थामा छ । नाका बन्द भएपछि मुस्ताङ र डोल्पाका पशुपालक तथा व्यापारीले च्यांग्रा खरिद गर्न नपाएपछि यो बर्ष भेडा, च्यांग्राको संख्या न्यून छ जसका कारण मुल्य वृद्धि भएको हो ।
कोरोनो अगाडि कोरला नाकामा हुने व्यापार मेलामा मुस्ताङ र डोल्पाका स्थानीय व्यापारी तथा पशुपालकले भेडा, च्यांग्रा खरिद गर्ने गरेकोमा कोरोनाकै कारण चीनले उत्तरी कोरलानाका खुला नगर्दा मुस्ताङ र डोल्पामै भेडा, च्यांग्राको अभाव खट्किएको हो । दसैं पर्वको सेरोफेरोमा औसत जोमसोममा करिब २३ हजारको संख्यामा भेडा÷च्यांग्रा झर्ने गरेको रेकर्ड छ । यद्यपि मुस्ताङबाट बजार झारिने भेडा÷च्यांग्राको भेटेनरी परीक्षण गर्दा व्यापारीले एकिन तथ्यांक पेश नगर्दा भेडा÷च्यांग्रा कति झरे भन्ने तथ्यांक निकाल्न समस्या पर्ने गरेको प्रधानमन्त्री कृषि आधुनिकीकरण परियोजना कार्यान्वयन इकाइ मुस्ताङका पशु चिकित्सक डा. सुधिर थापाले बताउनुभयो ।