पोखरा
पोखराबाट जोमसोमका लागि उडान भरी सम्पर्कविहीन भएको तारा एयरको विमान मुस्ताङको मानापाथी हिमालको फेदीमा रहेको आशंकाका साथ सुरक्षाकर्मीको टोली उक्त स्थानमा जादैछ । स्थानियले दिएको सुचनाका आधारमा तारा एयरको सम्पर्कविहीन ९ एन–‘एईटी’ ट्विनअटर बिमान खोज्नका लागी सुरक्षा फौजको टोली मानापाथी हिमालतर्फ जादै गरेको हो ।
खराब मौसमका कारण बिमानको खोजी कार्यमा निकै कठिनाई भएको छ । जोमसोमबाट गएको फिस्टेल एयरको हेलिकोप्टर जोमसोमबाट सम्भावित क्षेत्र पुग्ने प्रयास गरेता पनि खराब मौसमका कारण हेलिकोप्टर जान सकेको थिएन ।
विमान रहेको आशंका गरिएको मानापाथी हिमालको फेदीमा हेलिकोप्टर पुग्न नसकेपछि पोखरा बाट गएको नेपाली सेनाको एमआई–१७ हेलिकप्टर मुस्ताङको थासाङ गाउँपालिका–२ कोबाङमा अवतरण गरिएको छ । त्यहाँ बाट नेपाली सेना लगाएतको टोली उक्त स्थान तर्फ पैदल जादै गरेको बताईएको छ । कोबाङ बाट मानापाथी हिमालको फेदीमा पुग्न तिन घण्टा लाग्छ ।
विमानको खोजीमा ४ वटा पैदल टिमलाई मानापाथी हिमालको फेदी तर्फ पठाईएको नेपाली सेनाका उपरथी बाबुराम श्रेष्ठले जानकारी दिनुभयो । मानापाथी हिमालको फेदीमा रहेको आशंका गरिएता पनि सुरक्षा फौज त्यहाँ नपुगे सम्म विमान भेटिएको पुष्टि भने आधिकारीक रुपमा हुनेछैन् । यसअघि विमान थासाङ गाउँपालिकास्थित लेतेमा हुनसक्ने आशंका गरिएको थियो । तर, लेतेमा विमान भेटिएन ।
आज बिहान ९.५५ बजे पोखराबाट जोमसोम उडेको तारा एयरको जहाज १० बजेर ७ मिनेटमा सम्र्पक बिहिन भएको थियो । सम्पर्कबिहीन जहाजमा चालकदलका ३ सदस्य, १३ नेपाली, ४ भारतीय र दुई जर्मन नागरिक गरी २२ जना सवार थिए ।