गुल्मी, तमघास
गुल्मीमा मंगलबार रातिको अबिरल बर्षासँगै गएको पहिरोमा पुरिएर एकै घरका तीनजना दिदी बहिनीको मृत्यु भएपछि तमघास बजार शोकमा डुबेको छ । उक्त घटना भएको शोकमा आज तमघास बजार बन्द गरियो । जिल्लाको रेसुङ्गा नगरपालिका वडा नं ८ खानीगाउँको थुम्का लाइनका व्यवसायी तिलक परियारका ३ छोरीको पहिरोमा परेर मृत्यु भएको शोकमा दिउँसो १ बजेबाट तमघास बजार बन्द गरिएको उद्योग बाणिज्य महासंघ गुल्मीले बताएको छ ।
टेलरिङ्ग व्यवसाय गर्दै आएका तिलक परियारले प्राकृतिक विपत्ति पहिरोमा परेर २१ वर्षकी भावना परियार, १४ वर्षकी गंगा परियार साथै १४ वर्षकै जमुना परियार गरि ३ छोरी गुमाएका छन् ।
एक तले पक्की घर माथीबाट ढुंगामाटो सहितको पहिरो बीचको कोठामा पसेर एकै परिवारमा ३ जनाको मृत्यु भएको छ भने अन्य तीनजनालाई सकुसल उद्धार गरिएको छ । यस घटना पछि जिल्लाका जनप्रतिनिधी तथा स्थानीय प्रतिनिधि लगायतले दुख व्यक्त गरेका छन् ।
