जेन जी प्रदर्शनका क्रममा गण्डकी प्रदेश सरकार मातहतका मन्त्रालय र कार्यालयहरूको ४३ वटा चारपांग्रे र १०२ वटा दुईपांग्रे सवारी साधनमा तोडफोड र आगजनी भएको छ । अन्य २ वटा निजी मोटरसाइकल पनि जलेका छन् ।
प्रारम्भिक विवरण अनुसार यी सवारी साधनमा क्षती भएको मुख्यमन्त्री तथा मन्त्रिपरिषद् कार्यालयका सचिव रमेश ढकालले बताए । उनका अनुसार सबै सवारी प्रयोग गर्न नमिल्ने अवस्थामा पुगेका छन् । ‘सवारी साधन लगायत आगजनी र तोडफोडका क्रममा भएको क्षतिको विवरण संकलन भइरहेको छ’, ढकालले भने, ‘यकिन विवरण आउन केही दिन लाग्छ ।’मुख्यमन्त्री कार्यालयसहित गण्डकीका ६ वटा मन्त्रालयमा तोडफोड र आगजनी गरिएको छ । ४ वटा मन्त्री क्वार्टरमा पनि क्षति पुगेको छ । कृषि मन्त्रालय, स्वास्थ्य र अर्थ मन्त्रालयमा खासै क्षति पुगेको छैन । अन्यत्र आगजनी भएको छ । मन्त्रालय र कार्यालयहरुको सेवा सुरु गर्न अझै केही समय लाग्ने भएको छ ।
