पर्वतको विहादी गाउँपालिका वडा नं. ३ रानीपानी स्थित जनता आधारभूत विधालयमा अध्यापनरत शिक्षिका कोपिला पराजुलीले आफ्नो जन्मदिनको अवसरमा विद्यालयमा विविध शैक्षिक तथा आवश्यक सामग्रीहरू प्रदान गर्नुभएको छ । विद्यालयमा लामो समयदेखि अध्यापनरत शिक्षिका पराजुलीले जन्मदिनलाई केवल व्यक्तिगत उत्सवमा सीमित नराखी सामाजिक सेवाको माध्यम बनाउँदै आफ्ना विद्यार्थी, सहकर्मी शिक्षक तथा विद्यालय प्रशासनका लागि विभिन्न सहयोगी सामग्रीहरू वितरण गर्नुभएको हो।
समाजमा शिक्षा मात्र नभई सामाजिक उत्तरदायित्वमा समेत उदाहरणीय भूमिका निर्वाह गर्दै आउनुभएकी उहाँले विद्यार्थीहरूका लागि खेलकुदका सामग्री, शिक्षक शिक्षिकाहरूका लागि स्टेसनरी सामग्री तथा विद्यालय प्रशासनको अफिसियल प्रयोजनका लागि भित्ते घडी प्रदान गर्नुभएको छ। यस प्रकारको योगदानले पठन–पाठन, मनोरञ्जन तथा प्रशासनिक कार्यमा सकारात्मक प्रभाव पार्ने विश्वास विद्यालय र समुदायले गरेको छ।
विद्यालय परिवारले शिक्षिका कोपिला पराजुलीलाई जन्मदिनको अवसरमा हार्दिक बधाई ज्ञापन गर्दै उहाँको सु-स्वास्थ्य, दीर्घायु तथा शैक्षिक यात्रामा निरन्तर सफलता र प्रगतिको कामना गरेको छ। सामाजिक दायित्वप्रति देखाउनुभएको यस्तो सकारात्मक सोच, भावना र कार्यले सम्पूर्ण विद्यालय समुदायमा अनुकरणीय सन्देश प्रवाह गरेको विधालयले जनाएको छ ।
विद्यालयका प्रधानाध्यापक सूर्य बहादुर थापाले शिक्षिका पराजुलीको योगदानप्रति धन्यवाद व्यक्त गर्दै भन्नुभयो, “शिक्षक शिक्षिकाहरूले पठनपाठनसँगै सामाजिक उत्तरदायित्वप्रति पनि चासो राख्नु आजको आवश्यकता हो। कोपिला म्यामको यो कार्य सबैका लागि प्रेरणाको स्रोत बनेको छ।”
विद्यार्थी, अभिभावक तथा सहकर्मी शिक्षकहरूले समेत उहाँको कार्यको खुलेर प्रशंसा गरेका छन्। यस्ता सकारात्मक पहलहरूले विद्यालयको समग्र शैक्षिक वातावरणमा समेत सकारात्मक ऊर्जा थप्ने अपेक्षा गरिएको छ।
