सरकारले एक वर्षभित्रमा परिर्वतनको अनुभूति हुनेगरी काम गर्छ: मन्त्री गुरुङ

सरकारले एक वर्षभित्रमा परिर्वतनको अनुभूति हुनेगरी काम गर्छ: मन्त्री गुरुङ

  • Kanchan News

  • शनिबार, साउन १२, २०८१

  • 75
    SHARES
सरकारले एक वर्षभित्रमा परिर्वतनको अनुभूति हुनेगरी काम गर्छ: मन्त्री गुरुङ

सञ्चार तथा सूचना प्रविधिमन्त्री पृथ्वीसुब्बा गुरुङले वर्तमान सरकारलाई असफल हुने छुट नभएको बताएका छन् ।  वर्तमान सरकारले एक वर्षभित्रमा परिर्वतनको अनुभूति हुनेगरी काम गर्ने उनले उल्लेख गरे ।

नेपाल पत्रकार महासंघ कास्की शाखाले आज पोखरामा आयोजना गरेको पत्रकार सम्मेलनमा मन्त्री गुरुङले भने, ‘वर्तमान सरकारलाई असफल हुने छुट छैन, प्रधानमन्त्रीले पनि यसमा हामीलाई स्पष्ट दिशानिर्देश गर्नुभएको छ ।’

मन्त्री गुरुङले राजनीतिक स्थायित्वसहित सुशासन र विकासको गतिलाई तीव्रता दिन संसद्का दुई ठूला दल नेपाली कांग्रेस र नेकपा (एमाले) मिलेर सरकार बनाएको बताए । ‘संसदीय अभ्यासमा प्रमुख दुई ठूला दलको सरकार विरलै बन्ने गर्छ, हामीले पनि यसलाई अन्तिम विकल्पका रुपमा प्रयोग गरेका हौँ’, उनले भने, ‘यो सरकार पनि असफल भए मूल धारका पुराना राजनीतिक दलप्रतिको जनविश्वास टुट्छ ।’

सरकारले अर्थतन्त्र सुधार, रोजगारी सिर्जना, सुशासन र विकास गतिविधिलाई केन्द्रमा राखेर काम गर्ने मन्त्री गुरुङको भनाइ छ। डिजिटल नेपालको अवधारणाअनुसार विद्युतीय शासन सञ्चालनमा सरकारले जोड दिने उनले बताए ।  सञ्चारसँग सम्बन्धित ऐन, कानुनलाई समयसापेक्ष ढंगले परिमार्जन गरिने मन्त्री गुरुङको भनाइ थियो ।

‘अहिले पनि पुराना ऐन, कानुनबाट कतिपय सञ्चार संस्था चलिरहेका छन्, तिनलाई संशोधन र परिमार्जन गर्नुपर्छ, आवश्यक परेका कानुन निर्माणमा सञ्चार मन्त्रालयले विशेष पहल लिन्छ’, उनले भने, ‘हुलाकलगायत संस्थालाई आधुनिक ढंगले सञ्चालन गर्न आवश्यक छ ।’ मन्त्री गुरुङले टेलिकम सेवालाई थप गुणस्तरीय बनाइने बताए ।  सञ्चारमाध्यमको सवलीकरण र पत्रकारको वृत्तिविकासका लागि कार्ययोजना बनाएर काम गर्ने उनको भनाइ छ ।


सम्बन्धित समाचार

© copyright 2025 and all right reserved to Kanchan News