गण्डकी प्रदेश सरकारले ठूलो मात्रामा कर्मचारी सरुवा गरेको छ । कार्य सम्पादन,अनुभव र सिनियर भन्दा राजनीतिक पहुँचको तजबिजका आधारमा सरुवा गरिएको छ । २ वर्ष वा त्यो भन्दा बढी एउटा कार्यालयमा रहेका कर्मचारीहरुको सरुवा गर्ने मापदण्ड बनाइएको भएता पनि एक बर्ष पुरा नभएका कर्मचारहरुको पनि सरुवा गरिएको छ । निजामती कर्मचारीको सरुवा प्रक्रिया मनलाग्दी शैलीमा अपारदर्शी र विभेदकारी हुने गरेको भनेर चौतर्फी आलोचना भईरहेका बेला प्रदेश सरकारले त्यसको बेवास्ता गर्दै राजनितिक आडमा कर्मचारीको सरुवा गरेको पाईएको छ ।
कर्मचारी सरुवा व्यवस्थापन समेतको जिम्मेवारी पाएको मुख्यमन्त्री तथा मन्त्रिपरिषद्को कार्यालयले पहिलो चरणमा इन्जिनियरिङ, कृषि र वन समूहका कर्मचारीहरुको सरुवा गरेको छ बाकीँको केही दिनमा गर्ने तयारी छ । मुख्यमन्त्री तथा मन्त्रिपरिषद्को कार्यालयले सरुवा गरेपछि मन्त्रालय तथा जिल्लाका भित्रका कार्यालयहरुमा कार्यरत कर्मचारीको अदलीबदली भएको छ ।
पूर्वाधार विकास कार्यालय, सिँचाइ र खानेपानी डिभिजन, डिभिजन वन कार्यालय, भू—जलाधार कार्यालय, कृषि ज्ञान केन्द्र, पशु विज्ञ केन्द्रका प्रमुखहरु सबैजसो जिल्लाका फेरिएका छन् । त्यस्तै लेखाका कर्मचारीको पनि सरुवा गरेको छ । कति सम्म भने सरकारले डिभिजन वन कार्यालय तनहुँमा दरबन्दीभन्दा बढी कर्मचारी पठाइएको छ । अन्य जिल्लामा कर्मचारीको अभावमा कार्य सम्पादनमा समस्या सिर्जना भईरहदा तनहुँमा भने दरबन्दी भन्दा बढी कर्मचारी पठाएको छ ।
कर्मचारी सरुवामा पनि राजनितिक पूर्वाग्रह राख्दै सरकारले सिनियर अफिसरलाई मन्त्रालय थन्क्याएर जुनियरलाई नि.प्रमुखको जिम्मेवारी दिएर पठाएको छ । उपसचिव स्तरका कर्मचारीलाई मन्त्रालय थन्क्याएर प्रदेश सरकारले अधिकृत आठौँ स्तरका कर्मचारीलाई कार्यालय प्रमुखको जिम्मेवारी दिएको भन्दै कर्मचारी वृत्तमा असन्तुष्टि देखिएको छ । एक वर्ष नपुग्दै पटक पटक कार्यालय प्रमुख फेरिएका दृष्टान्त अनगन्ती छन् । सरुवालाई अब पनि व्यवस्थित र वैज्ञानिक नबनाई नेता र मन्त्रीको आसपासका कर्मचारी लाई काखा र अन्यलाई पाखा गर्ने हो भने सरकारी सेवाका कर्मचारीको कामप्रतिको उदासीनता अझ बढ्ने निश्चित देखिन्छ ।
सम्बन्धित मन्त्रालयबाट पठाएको स्थानमा नभइ केही फरक गरेर मुख्यमन्त्री तथा मन्त्री परिषद्को कार्यालयले सरुवा गरेको भन्दै मन्त्री र सचिवहरुले समेत असन्तुष्टि जनाएका छन् । कर्मचारीहरुले आफूलाई नियतवश पूर्वाग्रह राखेर सरुवा गरेर पेलेको आरोप लगाएका छन् ।
हेर्नुहोस कस्लाई कहाँ सरुवा गरियो
