पुश चौपायामा छालाको रोग (लम्पी स्किन डिजिज) को प्रकोप बढ्दै जान थालेपछि गण्डकी प्रदेशका किसानहरु चिन्तित बनेका छन् । लामो समय अघि देखि फैलिएको लम्पी स्किन रोग नियन्त्रणमा आउने आशा गरेका किसानहरु प्रदेशभरनै संक्रमणदर झनै बढ्दै गएपछि चिन्तित छन् । लम्पी स्किन रोगको सामान्य उपचार गरिए पनि गाईबस्तु बचाउन मुस्किल भइरहेपछि किसान चिन्तित छन् । डढेलो झै फैलिएदै गएपछि लम्पी स्किनलाई महामारीको रुपमा घोषणा गर्न गण्डकी प्रदेशका किसानहरुले सरकार सँग माग गरेका छन् । अखिल नेपाल किसान महासंघ गण्डकी प्रदेश कमिटीका अध्यक्ष गोवद्र्धन गौलीले किसानलाई राहत, क्षतिपूर्ति र पुनःस्थापनासहित राहतको प्याकेजका कार्यक्रम तत्काल ल्याउनुपर्ने बताउनुभयो । त्यस्तै बिमा कम्पनीले क्षतिपूर्ति समयमै भुक्तानी पनि नगरेको भन्दै किसानहरु दुखित बनेका छन् ।
गण्डकी प्रदेशमा २ हजार २८४ गाईबस्तु लम्पी स्किन रोगका कारण मरेका छन् भने हालसम्म ५८ हजार ९८२ गाइभैसी लम्पी स्किनबाट संक्रमित भएको र यसको नियन्त्रणमा विभिन्न प्रयासहरु गरिरहेको बताउनुहुन्छ कृषि तथा भूमि व्यवस्था मन्त्रालय पशुपंछी विकास महाशाखा प्रमुख डा. गृष्म न्यौपाने ।
गण्डकी प्रदेशका ११ जिल्लामै लम्पी स्किन फैलिएको छ । मुस्ताङको लोमान्थाङ, लो घेकर दामोदर कुण्ड र मनाङको नापाभूमि गाउँपालिकाबाहेक ८२ वटा स्थानीय तहमा लम्पी स्किनको संक्रमण फैलिएको छ । सबैभन्दा बढी गोरखाका १६ हजार ९९६ र कम मनाङका ११ पशुचौपाय लम्पी स्किनबाट संक्रमित भएका छन् ।