सुमन लम्साल, डब्लिन, आयरल्याण्ड
आयरल्याण्डको राजधानी डब्लिनमा चर्चित गायक निमा रुम्बाको भब्य शो हुने भएको छ । KTM ENTERTAINMENT & EVENTS  ले आयरल्याण्डको राजधानी डब्लिनमा अगष्ट १४ तारिखका दिन आयोजना गरेको भव्य सांस्कृतिक कार्यक्रममा रुम्बाको भब्य शो हुने भएको हो ।
सन् १९९२ देखि लगातार नेपाली संगीत र नेपालमा पप गीतलाई युवा पुस्तामाझ पुर्याउन सफल हरेक उमेर समूहले मन पराइएका गायक रुम्बाको प्रस्तुती हेर्न दर्शकहरुको भिड हुने आयोजकले दाबी गरेको छ । ‘मिस क्याटवाक’, ‘हुरी बतास’, ‘आऊ आऊ न’, ‘प्रीति बस्यो’ लगायत थुप्रै हिट गीत संगीतबाट दर्शक रिझाउन सफल रुम्बा गायक, गीतकार तथा संगीतकार मात्र नभई फिल्मका हिरो समेत हुन । नेपाली रक पप संगीतमा राम्रो पकड बनाएका गायक रुम्बा विदेशका विभिन्न कार्यक्रममा सहभागी छन् ।
अगष्ट १४ मा डब्लिनस्थित ख्यातिप्राप्त स्थान BUTTON FACTORY  मा पनि आफ्नो प्रस्तुति रहने गायक रुम्बाले बताए । यस कार्यक्रमको लागि जर्मनी को बर्लिन निवासी सुनिल शाक्यले बिशेष साथ दिने छन् । आयोजक तथा डिजे उज्ज्वल खड्काको अनुसार यो कार्यक्रम आयरल्याण्डमा अहिले सम्मकै इतिहास रच्ने नेपाली कार्यक्रम हुदैछ । कार्यक्रम हुनु भन्दा एक हप्ता अगाडि ४०० टिकट बूकिंग भई सकेको आयोजकले जनाएको छ । संयुक्त अधिराज्य वेलायत साथै युरोपको विभिन्न भागबाट निमा रुम्बाको प्रस्तुति हेर्न दर्शकहरु आउने आयोजकले अपेक्षा गरेको छ । आयोजकका अनुसार कार्यक्रमको सबै तयारी पुरा भैसकेको छ ।