सातौँ संस्करणको पोखरा स्पोर्टस् अवार्ड कार्यक्रममा वर्ष खेलाडी पुरुष, वर्ष खेलाडी महिला, लाइफ टाइम अचिभमेन्ट अवार्ड, वर्ष उत्कृष्ट प्रशिक्षक, वर्ष उदीयमान खेलाडी, वर्ष उत्कृष्ट खेलकुद सङ्घसंस्था वा क्लब र वर्ष उत्कृष्ट खेल पत्रकार अवार्ड गरी कूल सात विधामा अवार्ड प्रदान गरिएको छ ।उदयमान वर्ष खेलाडीको अवार्ड क्रिकेटर सुवास भण्डारीले जित्नुभएको छ । फुटबलका सुमित श्रेष्ठ र भलिबलका रवि केसीलाई पछि पार्दै भण्डारी उदीयमान खेलाडी घोषित हुनुभएको हो ।१९ वर्षीय सुवास भण्डारी नेपाली राष्ट्रिय यु–१९ का पहिलो रोजाइका अलराउन्डर हुनुहुन्छ । उहाँले गण्डकी प्रदेशको यु १९ टिम कप्तानी समेत गर्नुभएको छ । नेपाललाई यु १९ विश्वकप छनोटमा पुर्याउन उहाँको ठूलो योगदान छ ।
वर्ष उत्कृष्ट खेल सङ्घतर्फ कास्की जिल्ला ह्यान्डबल संघ उत्कृष्ट भएको छ ।
९ औँ राष्ट्रिय खेलकुद प्रतियोगितामा ज्यान गुमाएका प्याराग्लाइडिङ खेलाडी निसीम थापालाई कृर्तिशेष सम्मान अर्पण गरिएको छ । थापाको प्रतियोगिताकै क्रममा प्याराग्लाइडिङ दुर्घटना हुँदा गत असोज ३० गते थापाको मृत्यु भएको थियो ।यस वर्षको वर्षोत्कृष्ट खेल पत्रकार सागरराज तिमिल्सिना हुनुभयो । वर्ष उत्कृष्ट खेल प्रशिक्षकमा आर्चरी खेलका प्रशिक्षक किशोर कुमार गुरुङले अवार्ड हात पार्नुभयो । वर्ष उत्कृष्ट उदीयमान खेलाडी र वर्ष उत्कृष्ट प्रशिक्षकतर्फका विजेताले नगद रु ३५ हजारको साथमा ट्रफी प्राप्त गर्नुभएको छ । लाइफ टाइम अचिभमेन्ट अवार्ड बक्सिङ प्रशिक्षक विद्याप्रसाद मर्सानीलाई प्रदान गरिएको छ ।यस वर्षको उत्कृष्ट पुरुष खेलाडी क्रिकेटर करण के.सी बन्नुभएको छ । वर्ष उत्कृष्ट पुरुष खेलाडीको मनोनयनमा करण के.सी, प्रदीप खड्का र गंगा बहादुर कुँवर रहनुभएको थियो । के.सीले इलोक्ट्रोनिक स्कुटर प्राप्त गर्नुभएको छ ।कार्यक्रमका प्रमुख अतिथि गण्डकी प्रदेशका मुख्यमन्त्री सुरेन्द्रराज पाण्डेले खेलाडीहरूसँग साक्षात्कार गर्न पाउँदा खुसी लागेको बताउनुभयो । अवार्ड प्राप्त गर्नु हुनै सबैलाई उहाँले बधाई दिनुभयो ।
