पोखरा
पर्यटकीय नगरी पोखरामा आज देखि नवौँ राष्ट्रिय खेलकुद शुरु भएको छ । नेपालको खेलकुदको कुम्भमेलाको रुपमा लिईएको नवौँ राष्ट्रिय खेलकुदको उद्घाटन शुक्रबार पोखरा रंगशालामा उपराष्ट्रपति नन्द बहादुर पुनले गर्नुभएको हो । उद्धघाटन गर्दै उपराष्ट्रपति पुनले खेलको राष्ट्रिय तथा अन्तराष्ट्रिय महत्व व्यापक भएको बताउदै राष्ट्रको पहिचान, सम्मान र गरिमा अभिवृद्धि गर्न पनि खेलकुदको विकास अपरिहार्य रहेको बताउनुभयो । उहाँले खेलको माध्यम बाट नेपाल राष्ट्रलाई चिनाउने मात्र नभई खेलकुद बाट पनि नेपालको समृद्धि हासिल गर्न सकिने बताउनुभयो ।
खेलकुदमार्फत नागरिकको शारीरिक र मानसिक स्वास्थ्य, सामूहिक भावनाको विकास, एकता र अनुशासित तथा मर्यादित जीवनयापनमा सघाउ पुग्ने धारणा राख्दै उहाँले समग्र खेलक्षेत्रको विकासको लागि कुनै कसुर बाँकी राख्न नहुने बताउनुभयो ।
उद्घाटन समारोहमा नगरिक संस्कृति, पर्यटन तथा नागरिक उड्डयन मन्त्री जीवनराम श्रेष्ठ, खेलकुद मन्त्री महेश्वर गहतराज, गण्डकी प्रदेशका मुख्यमन्त्री कृष्णचन्द्र नेपाली पोखरेल, राष्ट्रिय खेलकुद परिषद्का सदस्यसचिव टङ्कलाल घिसिङ लगाएतले मन्तव्य राख्नुभएको थियो ।
उद्घाटन समारोहमा नेपाली सेना, सशस्त्र प्रहरी र नेपाल प्रहरीबाट मार्चपास, सातै प्रदेशका सांस्कृतिक झाँकी प्रदर्शनी, विद्यार्थीहरूबाट ड्रिल प्रदर्शन, विभिन्न सांस्कृतिक कार्यक्रम प्रस्तुत गरिएको थियो भने आतिशबाजीसहितका मनोरञ्जनात्मक कार्यक्रम पनि देखाईएको थियो । त्यस्तै ११ वटै टोलीको मस्कटसहित मार्चपास गरिएको थियो ।
सबै खेलका लागि खेलाडी तथा अफिसियल पनि पोखरामा आईसक्नुभएको छ । यसपटकको नवौँ राष्ट्रिय खेलकुदमा छ हजार एक सय ५७ खेलाडीले प्रतिस्पर्धामा भाग लिने राष्ट्रिय खेलकुद परिषद्का सदस्यसचिव टङ्कलाल घिसिङले जानकारी दिनुभयो । प्रतियोगितामा ३६ खेल र दुई प्रदर्शनीसहित ३८ खेल समावेश छन् । प्रतियोगितामा सात प्रदेश, तीन विभागीय र एनआरएन गरी ११ टोली छन् ।
औपचारिक उद्घाटन आज गरिएता पनि केही खेल यसअघि नै सुरु भइसकेका छन् । विसं २०३८ देखि सुरु नेपाली राष्ट्रिय खेलकुदको इतिहासमा २०४० मा दोस्रो संस्करणको राष्ट्रिय खेलकुद गर्ने अवसर पाएको पोखरालाई ३९ वर्षपछि नवौँ राष्ट्रिय खेलकुद घरेलु मैदानमा गर्ने मौका मिलेको छ ।
छत्तीस खेलमध्येका २६ खेल पोखरामा र अन्य खेल गण्डकीका अरु जिल्लामा आयोजना गरिएको छ । गण्डकीका लमजुङ, मनाङ र मुस्ताङबाहेकका सबै जिल्लामा नवौँ राष्ट्रिय खेलकुदका खेल सञ्चालन हुदैछन् ।