पोखरा
पोखरा स्थित प्रसिद्ध धार्मीक स्थल विन्ध्यवासिनी मन्दिरमा विगतकाबर्षहरुको तुलनामा पछिल्लो बर्ष आम्दानी घटेको छ । कोभिड १९ को महामारी यता विन्ध्यवासिनी मन्दिरको आम्दानी घटेको हो । विन्ध्यवासिनी मन्दिरमा पूजाआजा गर्न आउने भत्तालुहरुले चढाएको भेटी बाट मोटो रकम जम्मा हुने गर्दथ्यो । अहिँले भने कोभिड महामारी पछि भक्तजनको संख्या घटेपछि आम्दानी पनि घट्दै गएको हो ।
भक्तजनहरुले देवीलाई चढाएको भेटी र अरु पूजाआजा लगायतको आम्दानी दिनमै एक देखि डेढ लाख सम्म उठ्ने गरेता पनि अचेल भने दैनिक ५०÷६० हजार रुपैयाँको हाराहारीमा मात्र संकलन हुने गरेको विन्ध्यवासिनी धार्मिक क्षेत्र विकास समितिले जनाएको छ । विन्ध्यवासिनी मन्दिरमा ४५ जना कर्मचारी, विद्याश्रम लगायतका लागि मासिक खर्च लाखौँ रकम आवश्यक पर्छ । तर आम्दानीको स्रोत घटेपछि समस्या पैदा भएको छ । ३ सय वर्ष पुरानो विन्ध्यवासिनी मन्दिरको संरक्षण र रेखदेख ४० को दसकदेखि समितिले गर्दै आएको छ । समितिले मन्दिरमा भक्तजनले चढाउने भेटी पुजारीका खल्तीमा जाने परम्परा तोडेर समितिमै आउने थिति बसाएको छ । पुजारीहरु पनि तलबमा छन् । ४५ जना कर्मचारीमध्ये १० जना पुजारी, सरसफाइकर्ता, प्रशासकीय अधिकृत लगायत छन् । तलबमा मात्रै मासिक ९ लाख रुपैयाँ खर्च हुने गरेको ताईन्छ । अनुष्ठान र पूजाआजबाट पनि मन्दिरलाई आम्दानी हुन्छ । रुद्राभिषेक, विवाह, व्रतबन्ध, जन्मोत्सवको शुल्क,पार्किङ, लिफ्ट, फोटोग्राफर भाडा, पुस्तक बिक्री, एम्बुलेन्स सेवा शुल्क, सटर भाडा पनि मन्दिरका आम्दानीका स्रोत हुन् ।