मौद्रिक नीतिपछि लगातार दुई दिनसम्म उच्च अंकले वृद्धि भएको नेप्सेमा साताको तेस्रो कारोबार दिन भने गिरावट भएको छ । गत शुक्रबार राष्ट्र बैंकले मौद्रिक नीति सार्वजनिक गर्नु अगाडि घटेर बन्द भएको नेप्से मौद्रिक नीतिपछि आइतबार र सोमबार भने उच्च वृद्धि भएको थियो ।
दुई कारोबार दिनमा नै ११५ अंकले बढेको नेप्सेमा साताको तेस्रो कारोबार दिन मंगलबार भने २ प्रतिशत भन्दा माथिको गिरावट भएको छ । मंगलबार बजार परिसूचक नेप्से ४४.८० अंक (२.१० प्रतिशत) ले गिरावट भएर २०८८.१६ अंकमा बन्द भएको छ । सोमाबार राष्ट्र बैंकले बोलकबोल गरेको ट्रेजरी बिलमा बैकहरुले १४ प्रतिशतको ब्याजदर प्रस्ताव गर्दा त्यसको असर पनि सेयर बजारमा देखिएको बजारका जानकारहरु बताउँछन् ।
ट्रेजरी बिलले अल्पकालीन ब्याजदर माथि जाने संकेत गरेको र ब्याजदर वृद्धि हुँदा सेयर बजार प्रभावित हुने उनीहरुको तर्क छ । तर, अर्का एक अनुभवी लगानीकर्ता भने लगातार दुई दिन उच्च अंकले बढेको बजारमा मंगलबार नाफा बुक गर्न सेलिङ प्रसेर देखिएको बताउँछन् । दुई दिनमा उच्च अंकले बढेको बजारमा मंगलबार सेलिङ प्रेसर आएर करेक्सन हुनु सकारात्मक भएको उनको तर्क छ ।
मंगलबार नेप्से सँगै सबै उपसूचकमा गिरावट भएको छ । अन्य उपसूचक ३.५६ प्रतिशतले गिरावट हुँदा विकास बैंक उपसूचक २.९६ प्रतिशत, होटेल तथा पर्यटन र वित्त कम्पनी उपसूचक समान .७७ प्रतिशतले घटेको छन् । सोमबारको तुलनमा मंगलबार कारोबार रकम केही घटेपनि करिब ४ अर्ब पुगेको छ । मंगलबार बजारमा ८७ लाख ४० हजार ५५१ कित्ता सेयर किनबेच हुँदा ३ अर्ब ७० करोड ५० लाखको कारोबार भएको छ । कारोबार भएकामध्ये शिवम् सिमेन्टको सवार्धिक १९ करोड ३९ लाखको कारोबार भएको छ । त्यस्तै अरुण कावेली पावरको १५ करोड ५७ लाखको कारोबार भएको छ ।
