गण्डकी प्रदेशका युवा तथा खेलकुद मन्त्री राजीव गुरुङ (दीपक मनाङे) सांसद भएयता सदनमा बोलेका थिएनन् । बोल्दिनँ पनि भन्थे । तर बुधबार भने उनलाई नबोली धर भएन । आगामी वर्षको बजेटमाथि मन्त्रालयगत छलफलमा सांसदहरुले सोधेका प्रश्नको जवाफ दिन उनी रोस्ट्रम उक्लनै पर्यो । बुधबार पनि उनले आफूलाई बौल्नै नपरे हुन्थ्यो भन्ने भावना अभिव्यक्त गरे ।
‘म भाषण दिएर हिँड्ने मान्छे हैन, मेरो सट्टामा भाडामा कसैले भाषण गरिदिए, त्यसैलाई ल्याउथें । त्यसलाई १०-२० हजार दिन्थें,’ उनले भने, ‘म जबरजस्ती आएर बोलिरहेको छु ।’ उनले संसदमा भन्दा बाहिरै सुझाव र प्रश्न गरिदिएको भए हुन्थ्यो भन्ने पनि बताए । ‘प्रश्नहरु सजिलो सजिलै छ, तर मलाई प्रश्न गर्नेभन्दा अर्थमन्त्री र मुख्यमन्त्रीलाई सोध्नुपर्ने हो,’ उनले भने ।
ब्राजिलमा भन्दा धेरै ग्राउन्ड हुँदा पनि नपुगेको गुनासो आइरहेको मन्त्री गुरुङले बताए । ‘अघि म ट्वाइलेट गएको त्यहाँ पनि चार जना आएर खेल मैदान हाल्देऊ भन्छ । मैले खनेर बनाउने हो र ? मलाई त इरिटेड पार्या छ, पदै दिइदिन पाए हुन्थ्यो जस्तो लागिसक्या छ,’ उनले भने । ७ महिनामा ५ वटा सचिव परिवर्तन भइसकेको जानकारी उनले दिए । उनले यस्तै हुने भने आफ्नो मन्त्रालय नराखे पनि हुने विचारसमेत व्यक्त गरे ।
मन्त्री गुरुङले आफ्नै जिल्लाका लागि अरु मन्त्रालयबाट बजेट कम परेको गुनासो गरे । ‘मैले पनि शिक्षा मन्त्रालयबाट २ शीर्षकमा २५ लाख पाएको छु । वन र कृषि मन्त्रालयबाट १ रुपैयाँ पनि पाएको छैन । उनीहरूसँग रिसाएर हुन्छ ?,’ उनले प्रश्न गरे । मनाङको प्राथमिकता पर्यटन भएको तर बजेट केवल ५ लाख पाएको उनले सुनाए ।
मन्त्री गुरुङले रातो किताब हेर्न सबै सांसदलाई आग्रह गरे । ‘रातो किताब पाउनुभएको छ । त्यहाँ हेर्नुस् न । सबैमा बजेट परेको छ,’ उनी भन्छन्, ‘दुई सय पाँच वटा ग्राउन्ड मैले गत वर्ष बनाएको छु । त्यो हेर्न सक्नुहुन्छ । कसैले पैसा लगेर बनाएको छैन भने, तपाईंहरू सांसद हो, समात्नुस् ।’ अहिले १ सय ५२ वटा बन्दै छन् ।’ गएको वर्ष स्कुलमा २६ वटा खेल मैदान बनाएको र अहिले ३८ वटा खेल मैदान बनाउने योजना रहेको पनि उनले सुनाए ।
