पोखरा
गण्डकी प्रदेशको राजधानी पोखरा देखि सुदूरपश्चिमको धनगढी सम्म सिधा हवाई उडान सञ्चालनमा आएको छ । बुद्ध एयरले बुधबारदेखि पोखरा–धनगढी सिधा उडान सुरु गरेको हो । पोखरा–धनगढी साताको ३ दिन आइतबार, बुधबार र शुक्रबार उडान हुनेछन् । पोखराबाट बिहान ११ः४० मा जाने र धनगढीबाट १२ः५० मा फर्कने उडान तालिका छ । ५५ मिनेटको हवाई दुरीमा भाडादर ६ हजार ९ सयदेखि १२ हजार २ सय ४० रुपैयाँ सम्म कायम गरिएको छ ।

पोखरा–धनगढी विमान सञ्चालनको पहिलो दिन १८ यात्रु बोकेर विमान धनगढी पुगेको छ । धनगढी जाने यात्रुलाई गण्डकी प्रदेशका पर्यटन, उद्योग, वाणिज्य तथा आपूर्ति मन्त्री मणिभद्र शर्मा कँडेलले विदाई गर्नुभयो । विदाई गर्दै उहाँले दिनभरी लाग्ग्ने लामो दुरीको यात्रा अब छोटिएकोमा खुसी व्यक्त गर्दै दुई प्रदेशको राजधानीबीच सिधा हवाई उडान सञ्चालन हुँदा आन्तरिक पर्यटन प्रवर्द्धनमा सहयोग पुग्ने विश्वास व्यक्त गर्नुभयो ।
पहिलो फ्लाईटमा धनगढी गएको नाट्टाको टोलीले दुई दिनसम्म धनगढी र वरपरका पर्यटकीय गन्तव्यको भ्रमण गर्ने गर्ने कार्यक्रम छ भने शुक्रबार सुदूरपश्चिम प्रदेशका तीन मन्त्री र व्यवसायी सहितको टोली पोखरा भ्रमणमा आउने कार्यक्रम तय भएको बताईएको छ ।