गण्डकी प्रदेशभर पछिल्लो २४ घण्टामा ९ सय जनामा कोभिड संक्रमण पुष्टि भएको छ । तेस्रो लहर सुरु भएपछि यो पहिलो सबैभन्दा ठूलो आँकडा हो । ती ९ सय संक्रमितमध्ये २६८ जनाचाहिँ चिकित्सक, नर्स र स्वास्थ्यकर्मीहरु हुन् । कास्कीका मात्रै १३८ स्वास्थ्यकर्मी संक्रमित भएका छन् ।
गण्डकी प्रदेश स्वास्थ्य निर्देशनालयका अनुसार अब प्रदेशमा सक्रिय संक्रमितको संख्या ४ हजार १ सय १७ पुगेको छ । पश्चिमाञ्चल क्षेत्रीय अस्पतालका थुप्रै स्वास्थ्यकर्मीहरु संक्रमित भएका छन् । अस्पतालका निर्देशक डा भरत खत्रीले ७० जना स्वास्थ्यकर्मी संक्रमित भएको जानकारी दिए । प्रदेशकै सबैभन्दा ठूलो पश्चिमाञ्चल क्षेत्रीय अस्पतालमा धैरै स्वास्थकर्मी संक्रमित हुँदा सेवा प्रभावित भएको निर्देशक खत्रीले बताए । ‘उपचारका लागि खटिने स्वास्थ्यकर्मी नै संक्रमित हुँदा वडाहरुमा ड्युटी गर्ने मान्छे नभएर अप्ठेरोे परेको छ,’ उनले भने, ‘शनिबारबाट त हामीहरुले पहिलका वैकल्पिकहरुलाई पनि बोलाएर काम लगाएका छौं ।’
क्षेत्रीय अस्पतालमा ६ सयजना स्वास्थ्यकर्मी छन् । अस्पतालको रेट्रोफिटिङ भइरहेकाले अस्पतालमा अहिले ५० मात्र कोभिड बेड छन् । जसमा २७ जना कोरोनाका बिरामी उपचारत रहेको खत्रीले बताए । ‘देशमा ठूलाठूला सभा सम्मेलन भए । पोखरामा त ठूलो भिडभाडका साथ न्युइयर भयो । विभिन्न खेलकुद कार्यक्रम भए यसबाट कोरोना स¥यो,’ उनले भने ।
कोरोना संक्रमति दिन प्रतिदिन बढ्दै गएपछि पश्चिमाञ्चल अस्पतालमा अक्सिजनका २ वटा मेसिन चलाउनुपर्ने अवस्थामा आइपुगेको खत्रीले सुनाए । ‘सबैले स्वास्थ्यका मापदण्डहरु अपनाउनुप¥यो । सरकारले एकचोटि फेरि लकडाउन नै गर्नुपर्छ । एकजनाको पहलबाटमात्र कोरोना नियन्त्रण हुन गाह्रो छ,’ उनले भने । क्षेत्रीय अस्पतालमा अर्थाे, गाइने वार्डको सेवा नै प्रभावित हुने गरी जनशक्ति अभाव देखिन थालेको छ । कारण—ती वार्डका स्वास्थ्यकर्मी नै संक्रमित हुनु ।
संक्रमणदर बढ्दै गएपछि प्रदेशमा एम्बुलेन्स सेवा, हेलो डक्टर र चालक लगायत सेवा प्रभावित भएको छ । पोखरा ३० स्थित संक्रामक तथा सरुवा रोग अस्पतालका १२ जनामा संक्रमण देखिएको जानकारी अस्पतालका कार्यकारी निर्देशक डा विकास गौचनले दिए । उनकै भनाइमा अहिले उक्त अस्पतालमा उपचारका लागि कोभिडका १२ बिरामी पनि छन् ।
गण्डकी शिक्षण अस्पताल पृथ्वीचोकका २० स्वास्थ्यकर्मी संक्रमित भएको जानकारी मेडिकल सुपरिटेन्डेन्ट डा टुमाया घलेले दिइन् । उनकै भनाइमा गण्डकी मेडिकल कलेजले विद्यार्थीको पढाइ सुरु अनलाइन गरिसकेको छ । बाटोघाटोमा हिँडडुल गर्दा मास्क नलगाउने, लगाए पनि चिउँडोमा राख्ने, मान्छे भेटिए झन् मास्क खोलेर बोल्ने प्रवृत्ति देखिएको डा घलेले सुनाइन् ।
कोरोनालाई सामान्य रुघाखोकी त हो भन्दै धेरैले हेलचक्र्याइँ गरेको पाइएको घलेले बताइन् । सर्वसाधारण संक्रमित हुने दर बढ्नाले नै चिकित्सक र स्वास्थ्यकर्मी पनि संक्रमित हुन पुगेको उनको भनाइ छ । ‘घरमा पनि भौतिक दुरी कायम गर्नुपर्छ,’ उनले भनिन् । नेपाल मेडिकल एसोसिएसन गण्डकीका पूर्वअध्यक्ष डा निर्मल लामिछाने फ्रन्टलाइनर भएकैले चिकित्सा र स्वास्थ्यकर्मी संक्रमणको जोखिममा रहेको बताए । गण्डकी प्रदेश स्वास्थ्य निर्देशनालयका प्रादेशिक स्वास्थ्य आपतकालीन कार्य सञ्चालन केन्द्रका संयोजक नवराज शर्मा संक्रमण दर बढ्नुको कारण स्वास्थ्य मापदण्ड पालनामा भएको हेलचक्र्याइँ मान्छन् । ओमिक्रोन त केही रहेनछ भन्ने ठान्ने, भीडभाडमा जाने सर्वसाधारणदेखि सबैजसोको मनोवृत्ति र प्रवृत्ति देखिएको उनी बताउँछन् ।
संक्रमण हुनेमा सबैभन्दा बढी कास्की जिल्ला छ । शनिबार कास्कीमा ४ सय ८९ जनामा संक्रमण पुष्टि भएको स्वास्थ्य निर्देशनलायले जानकारी दिएको छ । प्रदेशका अन्य जिल्लाहरु नवलपरासीमा ६१, स्याङ्जामा १२३, तनहँुमा, ६९, म्याग्दीमा १९, बागलुङमा ३७, लमजुङमा ४५, मुस्ताङमा १, पर्वतमा १६, गोर्खामा ४० जना संक्रमण पुष्टि स्वास्थ्य निर्देशनालयले जनाएको हो र शनिबार संक्रमित मध्य प्रदेशमा २ सय ६८ जना स्वास्थ्यकर्मी छन् । यसमध्ये पनि कास्कीमा सबैभन्दा बढी स्वास्थयकर्मी संक्रमित देखिएका हुन् ।
कास्कीमा एकैदिन १ सय ३८ जना स्वास्थ्यकर्मी कोरोना पुष्टि भएको स्वास्थ्य निर्देशनालय गण्डकीले जानकारी दिएको हो । संक्रिमितमध्ये गोरखामा ६ जना, मुस्ताङमा ३, म्याग्दीमा ९, लमजुङमा २०, तनहुँमा ४२, नवलपरासी पूर्वमा १७, स्याङजामा १२, पर्वतमा १० र बागलुङमा ११ जनामा स्वास्थ्यकर्मीमा कोरोना पुष्टि भएको छ ।
गण्डकीमा २ संक्रमितको मृत्यु
गण्डकी प्रदेशका गोरखा र पर्वतमा कोभिड संक्रमणबाट १÷१ जनाको मृत्यु भएको छ । गएको सातायता संक्रमित मृत्युको रेकर्ड शुक्रबार दर्ज भएको हो । गण्डकीमा कोरोनाबाट मृत्यु हुने १ हजार ४ सय ३२ पुगेका छन् । पर्वतको कुश्मा नगरपालिका–१३ की २३ वर्षीया महिलाको बिहीबार पोखरा स्वास्थ्य विज्ञान प्रतिष्ठानमा मृत्यु भएको थियो । उनमा बिहीबार नै कोरोना संक्रमणको पुष्टि भएको हो । बिहीबारै संक्रमण पुष्टि भएका गोरखा नगरपालिका–११ का ४० वर्षीय पुरुषको सोही दिन मृत्यु भएको हो । गण्डकी प्रदेशमा बिहीबार ९ सयजनालाई कोभिड संक्रमण भएको गण्डकी प्रदेश स्वास्थ्य निर्देशनालयले जनाएको छ ।
कास्कीमा सक्रिय संक्रमित २ हजार १ सय ५६ जना पुगेका छन् । स्याङ्जामा सक्रिय संक्रमितको संख्या ५ सय ८ पुगेको छ । गोरखामा ४०, मुस्ताङमा १, म्याग्दीमा १९, लमजुङमा ४५, तनहुँमा ६९, नवलपरासी पूर्वमा ६१, पर्वतमा १६ र बागलुङमा ३७ जनामा संक्रमण पुष्टि भएको छ ।
